جوانکاری بەبێ نەشتەرگەری

جوانکاری بە تاڵی پزیشکی

مەرج نییە هەموو جوانکارییەک نەشتەری تیا بەکار بهێنرێت، زۆر جوانکاری هەن کە تەنها لە ڕێی دەرزی لێدانێکەوە ئەنجام ئەدرێت، وەک دانانی بۆتۆکس و فیڵەر و پلازما و ... تا دوایی.
لە نێوانیاندا دانانی تاڵی پزیشکی ڕاکێشان یەکێکە لەو ڕێگایانەی جوانکاری کە تەنها لەڕێی کونێکی بچووکەوە ئەنجام ئەدرێت.
زیاترینی ئەم تاڵانە بەکاردێن لەو کەسانەی کە ڕوخساریان تازە دەستی کردووە بە داکەوتن و گۆڕانکارییەکانی تەمەن، هەر بۆیە بەکاردێن بە مەبەستی بەرزکردنەوەی برۆ، ڕوومەت، ڕوخسار، ژێر شەویلگە و سنگ.
ئەم تاڵە دڕکاوییانە پێکهاتوون لە مادەی پرۆلین، کە لە لەشدا ئەمێننەوە و نامژرێنەوە. بە قەبارەی جیاجیا هەن و بە گوێرەی شوێنی بەکارهێنانیان قەبارەکانیان ئەگۆڕێن. بەدرێژاییان و بە یەک ئاڕاستە دڕکی زۆر بچووکیان پێوەیە و لە ناوەوە ئەچەقنە ئەو بەشەی بەرزی ئەکەنەوە، تاوەکو لە شوێنی خۆیاندا جێگیر ببن ئەو بەشە بە هەڵواسراوی بهێڵنەوە و بەر نەبن.
لە خەسڵەتە باشەکانی ئەم تاڵانە ئەوەیە کە دانانیان کەمتر لە کاژێرێکی پێ ئەچێت و تەنها بە سڕکردنی ئەو بەشە و لە ڕێی کونێکی زۆر بچووکەوە ئەنجام ئەدرێت و پێویست بە نەخۆشخانە ناکات و هەمان کات نەخۆشەکە ئەگەڕێتەوە ماڵەوە، لەلایەکی تریشەوە شوێن نەشتەر و بڕین و دورینەوەی تێ ناکەوێت، ئەمەش سوودێکی زۆری هەیە لەو خانمانەی ترسی بێهۆشکردن و نەشتەرگەرییان هەیە، بەڵام ئەوەیە ماوەی کاریگەرییان کاتییەو و بۆ ماوەی دوو بۆ پێنج ساڵ (یان زیاتر) ئەمێننەوە و ئەبێت دووبارە دابنرێنەوە بە گوێرەی ویستی کەسە خۆی.
لە ئێستادا دانانی ئەم تاڵانە داوای زۆریان لەسەرە، بە تایبەتی لەلایەن خانمانەوە.